Z Drjowka/Drebkau. Ku kóńcoju lěta jo cas gódownych wustajeńcow w muzejach. Teke w Serbskej tkajaŕskej śpě w Drjowku dajo něnto nowu rědnu wósebnu wustajeńcu. „Z tym smy grali“/„Damit haben wir gespielt“ jo jeje nadpismo. Prezentěruju grajki ze zachadnych dnjow: Pupki a pupkowe śpicki,  graśa, bariki, knglicki a wjele wěcej.

Koncipěrowała jo tu wustajeńcu Ingrid Standtkowa (Standtke), cłonk Spěchowańskego towaristwa Serbskeje tkajaŕskeje śpy. Ta 73lětna jo slědnu gódownu wustajeńcu tencas hyšći z něgajšneju wjednicu muzeja Roswithu Baumertoweju (1942–2021) sobu natwariła. Wóna wě, źo wšykne kuse zběrki se wobchowaju. Śěžkosći jo dało pśez to, až sobuźěłaśeŕka małego muzeja Katalin Poraczkowa dla chórosći na dlejšy cas wupadnjo, a nowa sobuźěłaśeŕka  Jennifer Krawcojc ma se nejpjerwjej zaźěłaś. Ta 23lětna jo Ingrid Standtkowu pódpěrała, ale ta slědna jo dała tej wustajeńcy „woblico“.