Slěpe/Schleife. Projekt WITAJ a 2plus stej stojałej ceło naprědku na 7. slěpjańskej źěłarnicce pśichoda Wósym jsow, jadna wósada pśed dwěma tyźenjoma srjodu. Wó tom jo nas informěrował župan slěpjańskeje Domowinskeje župy Jakub Lorenc-Zalěski Manfred Hermaš.
Na wobradownju jo se wobźěliło 30 zastupnikow towaristwow a institucijow, mjazy drugim slěpjański šołta Reinhard Bork a cłonk serbskeje pśirady zgórjelskego wokrejsa Měrćin Nowak. Dr. Jana Šołćina ze Serbskego instituta w Budyšynje jo pśedstajiła rezultaty swójogo slěźarskego projekta „Bilingualne pśiswójenje rěcy w projekśe WITAJ“. Za rownisku Witaj-źiśownju jo slěźarka wuslěźiła, až potencial pśiswójenja serbskeje rěcy njejo wupócerany, a na tom su wina ramikowe wuměnjenja (Bedingungen) w srjejźnej Łužycy, kótarež by se dejali pśeměniś.