Na wobšěrne poetiske dźěło wuměłče Jutty Mirtschin skedźbni opulentny wobrazowy zwjazk, kiž je spočatk lěta 2021 w Ludowym nakładnistwje Domowina wušoł. Wón wobsahuje jeje twórby na polu swobodneho (molerstwo a grafiku) a nałožowaneho wuměłstwa (ilustracije a dźěła za dźiwadło). Mólby pokazuja cunje kwětki, gracilne žony, zrudnych clownow a samotne figury w dalokej krajinje. Wone jimaja, hačrunjež (abo dokelž) leži nade wšěm často styskna melancholija.