Wudana wót Michaela Rauhuta a Thomasa Kochana jo „Bye bye, Lübben City“, antologija DDRskeje subkultury. W jadnab 40 pśinoskach wulicuju awtory wót pśijaśelow blues-muziki a hippiejow, kótarež su dundali pó stronach DDR, wósebnje w casu 1960ych do 1980ych lět. Wóni su se cesto pokazali z dłujkimi włosami, „jezusowymi“ sandalami a parka-jakami. Wšake muzikowe kupki z teje sceny, ako su grali „pódzajtšny“ rock, folk a blues, su se zasłužyli dobre mě: Take su Freygang, Keimzeit, Klaus Renft Combo abo kupka Drudenfuss ze Złego Komorowa.

Centrumy togo młoźinskego gibanja su byli wósebnje Barliń, Sakska a Durinska.Weto jo se teke w Dolnej Łužycy wšake tšojło, ale jano pór awtorow rozkłažo to dokradnjej. Tak naspomnjejo Christoph Dieckmann južo w prědnem eseju festiwal za lichy jazz w Picnju, kenž su pśewjadli mjazy 1973 a 1982. To małe město wesrjejź dolnoserbskich jsow jo było we tom casu zmakanišćo za wšake subkulturelne kupki w DDR. Teke we Wjerbnje su cłonki alternatiwneje sceny swěśili, ako wulicujo muzikaŕ Peter „Cäsar“ Gläser w pśinosku Antje Pfefferoweje.