Pódstupim/Potsdam. Gmejnam, amtam a wokrejsam, kótarež laže w serbskem sedleńskem rumje, buźo Bramborska zarownaś wše kosty, ak jim nastanu dla serbskeje kazni. Za to jo ministarstwo za wědomnosć, slěźenje a kulturu wuźěłało tekst wustajenja – a wón jo se diskutěrował na wobradowanju Serbskeje rady wałtoru tyźeń.
We wustajenju stoj, až zastojnstwa budu dostawaś kužde lěto pawšalu: amtske gmejny 500 euro, a amty, wokrejse a njeamtske gmejny (amtsfreie Gemeinden) 1000 euro na lěto.
Nowa serbska kazń płaśi južo wót 1. junija 2014, a zastojnstwa směju póžedaś za pjenjezymi za cas 2014-2016, pśi comž za lěto 2014 wunjaso ta pawšala jano 50% teje zwjercha pomjenjoneje sumy.
Z pjenjezymi teje pawšale deje komuny zapłaśiś stawne pśełožowarske kosty, wósebnje za serbske wuzwólowarske znatecynjenja, geografiske mjenja, mjenja drogow, serbske teksty, listy wobydlarjow. Wušej togo budu jim jaden raz zarownaś kosty zgótowanja dwójorěcnych štempelow, amtskich pismow a computerowych systemow, aby mógali ze serbskeju rěcu źěłaś.