Z Baršća/Forst. Zachopjeńk nowembra, na pósejźenju wuběrka za serbske nastupnosći wokrejsa Sprewja-Nysa (SPN), jo Měto Nowak informěrował wó wšakich nowych napšawach w Bramborskej. Referent krajnego zagronitego za nastupnosći Serbow jo mjazy drugim pokazał na wósebnu akciju Maśice Serbskeje.
Z pódpěru bramborskego Ministaŕstwa za wědomnosć, slěźenje a kulturu (MWFK) pśigótujo to towaristwo pakśiki ze serbskimi medijami za komunalne biblioteki wokrejsow. Z tym kśě póbitowaś wěcej móžnosćow za cytarjow, aby se zaběrali ze serbskeju kulturu a wuknuli serbsku rěc.
Glědajucy na lětosne pśeměnjenje nimskego kněžaŕstwa jo wón teke informěrował wó wokomuźenje serbskich projektow, ako dostanu pjenjeze z fondsa za strukturnu změnu we wuglowych regionach. Zazdaśim mógu za šesć projektow w Bramborskej (wóni deje dostaś 19 milionow euro w běgu źaseś lět) nic južo wót januara, ale akle wót maja 2022 zachopiś z konkretnym źěłom.