Z Města/Cottbus. Zachadnu sobotu jo Załožba za serbski lud wugótowała 37. Schadowanku. Lětosa jo se pak wótměł bźez zgromadnego rejowanja w kafeteriji Dolnoserbskego gymnaziuma (DSG). Źiwajucy na aktualnu pandemisku situaciju su k prědnemu razoju organizěrowali digitalnu wersiju (2020 jo jano dało mału online-konferencu) togo zmakanja. Su filmowali w kafeteriji DSG, to pak bźez gósći a jano z wuměłcami, technikarjami a z moderaciju. Dnja 18. nowembra su se organizatory rozsuźili pśeśiwo prezencnemu swěźenjoju, dla cogož su musali wšo nowo zrědowaś, a to w běgu jano jadnogo tyźenja. „To njejo lažko było“, groni Simone Poetzschowa, sobuźěłaśeŕka Załožby za serbski lud. „Wušej togo stej źeń pjerwjej naraz wupadnułej dwa programowej dypka. Weto: Smy se procowali wó dobry wótběg, lěcrownož smy měli pór śěžkosćow.“