Z Halby/Halbe. Tudy jo w aprylu1945 była tšašna bitwa. Prědna Běłorusojska fronta jo zachopiła ofenziwu na Barliń, zgromadnje z trupami Prědneje Ukrajnskeje fronty jo zawrěła wjeliki kóśeł wokoło stronow wót Halbego do Lubina. Nutśi su byli wjelike źěle nimskego Źewjetego wójska a Stwórte pancerowe wójsko, dogromady 200.000 muskich. K tomu jo pśišło wjele ciwilistow. Stuacija jo była bźez naźeje. Sowjetske wójsko jo wušemu rozkazowarjeju Źewjetego wójska, generaloju Bussemu dał póbitowanje wó kapitulaciji. Busse jo to wótpokazał a wukaz powěźeł: Wezmiśo wše mócy gromadu a wopytajśo pśederjenje do směra pódwjacora! Trupy Bussego su zwětšego wobstojali z młodostnymi, 16 do 17 lět stare a bźez nazgónjenja. Ten wukaz jo był zachopjeńk wjelikego zamrěśa w kótle pla Halbego. Sowjetske zwěstki bombarjow su pśilětali a chyśili bomby do gólow wokoło Tupza (Teupitz), Halby a Serbskego Bukojca. Nisko leśece lětadła su atakěrowali te kolony na połnych drogach a „Katjuše“ (raketowe stśělenje) su stśělali na te nimske trupy a sowjetske granaty su trjefili. Nimske wójsko jo wójowało, zadermo.