Z Města/Cottbus. Zachadny pětk jo se jadnab 30 wědomnostnikow a gósći wobźěliło na nazymskem pósejźenju Dolnołužyskego towaristwa za historiju a krajowědu. Głowny tema pósejźenja jo była „1.700 lět žydojstwo w Nimskej – 700 lět žydojske žywjenje w Dolnej Łužycy“. Nic w Měsćańskem domje, ale w Měsćańskem muzeju (městno su krotko do togo nowo póstajili), su se zmakali a pśisłuchali wšakim pśednoskam ku tej tematice.

Dopołdnja jo Steffen Krestin, pśedsedaŕ Dolnołužyskego towaristwa za historiju a krajowědu a wjednik Městohistoriskich zběrkow (Stadtgeschichtliche Sammlungen), pśiwitał cłonkow do zmakanja. Korony dla jo to pósejźenje pśisamem wupadnuło, wón jo pak gronił, až jomu ta tematika wjelgin na wutšobje lažy. Źiwajucy na pśiběrajuce wuzamknjenje wuběgańcow a drugich mjeńšynow na kšomje towarišnosći, jo to wažnje se zaběraś ze žydojskim žywjenim něga a źinsa. Wušej togo jo pšosył wó moment, aby se gromaźe spominali na Matthiasa Baxmanna. Dłujkolětny cłonk towaristwa a wótwardowaŕ pomnikow jo w juliju, pó śěžkej chórosći, wumrěł.