Towaristwo za spěchowanje serbskeje rěcy w cerkwi co wó swójom źěle informěrowaś a zajmowanych luźi motiwěrowaś, aby sobu gótowali. Za to dajo pódla info-blidow a pódla jich webboka www.serby-ekbo.de teke flyer. Pó někotarych lětach jo to notne było, jo pśed nowym śišćom wobšyrnje pśeźěłaś. Ten nadawk jo měło towaristwowe pśedsedaŕstwo na starosći. Wěsty cas jo to trało, až su wšykne, pó wěcej korekturach, spokojom byli. Nowe złožone łopjeno pósrědnijo wšo wažne krotko a w pśeglědnej formje. „WERBEstudio3“ jo pśi tom pśewzeło grafiske wugótowanje.

Rozrědowanje „cora – źinsa – witśe/gestern – heute – morgen“ su wobchowali. Pód „cora“ pśedstajiju pśeglěd wó Serbach a serbskich cerkwinych stawiznach. Pód „źinsa“ se pśedstajijo towaristwo za spěchowanje serbskeje rěcy w cerkwi. Informěrujo, ga a cogodla jo se załožyło. How teke nalicyju swóje aktiwity k pódpěrje pśi namšach, w rozgłosu a pśi wudaśu publikacijow.