Z Huštanja/Wüstenhain. Rowno jo wujšło pominanje Hanza Wylema-Keła wó moratorium dla wótryśa Miłoraza. Wón jo se ako powědaŕ wuběrka za regionalne wuwiśe a góspodaŕstwo Serbskego sejma wobrośił na pśedsedaŕstwo LEAG, „Lausitz Energie Bergbau AG“ a na „Lausitz Energie Kraftwerke AG“. Chylijo zajm na „Studie zur Revision des Revierkonzepts 2021 der LEAG – Inanspruchnahme des Sonderfeldes Mühlrose ist energiewirtschaftlich nicht notwendig“ Nimskego instituta za góspodaŕske slěźenje, źož jo dalšny raz njewótwisne městno pokazało, až se wugel pód Miłorazom dla wótstupa z brunicoweje industrije wěcej njetrjeba. „Weto južo wótrywa Wašo pśedewześe Miłoraz kšac pó kšacu“, pišo Hanzo Wylem-Keł spomnjetym adresatom. „Na kóńcu stoj nejskerjej wopusćona wjas ako wopomnik za ten bźezmyslny akt znicenja serbskeje kulturneje krajiny [...]“, cytamy dalej. Togodla pominaju pódpisarje togo lista moratorium dla wótryśa, a to naměsće. Njewótwisnje wót togo dejali luźe móc dobrowólnje swójo zarownanje dostaś se hynźi nowu domownju natwariś.