Serb Jan Bok jo ako dorosćony we Wušej Hungorskej žywy był a statkował, snaź njejo togodla w domowni tak derje znaty. We Hungorskej a Słowakskej jo wón pak až do źinsajšnego sławna historiska póstawa: Jan Bok (nimski Hans Bock, łatyński Johannes Bocatius). Pódla (mjazy drugim) Albina Mollera, Handroša Tary a Simona Muslika słuša wón k serbskim wósobam doby renesance, ako su se pśez wósebne wugbaśa wjeliki wuznam dobyli. Tak ako teolog Muslik jo teke Jan Bok syn města Wětošowa, źož jo tencas hyšći wjelicki źěl ludnosći serbski był. Dnja 12. nowembra 1621 jo Jan Bok wumrěł. Toś dej ku góźbje jogo 400. smjertnego dnja na žywjenje a statkowanje togo wuznamnego, bóžko zabytego serbskego diplomata, pedagoga a humanistiskego basnikarja we srjejźi stojaś.