Z Pódstupima/Potsdam. Zachadnu wałtoru jo bramborska ministaŕka za kubłanje, Britta Ernstowa (Ernst, SPD) pśedstajiła pśedłogu za nowe Serbske šulske póstajenje (Sorben-/Wenden-Schulverordnung, SWSchulV) na pósejźenju Bramborskeje serbskeje rady. Serbska rada jo pśedłoze nowelěrowanej SWSchulV jadnogłosnje pśigłosowała. Pśedsedaŕka serbskeje rady Kathrin Šwjelina jo wujasniła: „To póstajenje dajo aktualny zakład za wucenje serbskeje rěcy, wót prědnego lětnika až do abitury. Głowny cil jo něnto, až změjomy wěcej interesentow za to wukubłanje na ceptarja.“ Serbska wucba jo dostała nowy zakład, stawnje wucyś ten fach wót prědneje rědownje až do abitury. Móžnosći su rozšyrjone, aby we tej wucbje diferencěrowanje pó niwowje mógali wucyś a wuknuś. Teke pódpěra maminorěcnych kompetencow dej byś, a pšawidłowny monitoring teje wucby. Na zakłaźe togo monitoringa cotej Serbska rada a bramborske kubłańske ministaŕstwo (MBJS) dłujkodobnje dalej wuwijaś kwalitu a kwantitu.