Z Města/Cottbus. Za tym až zadłužony wjerch Hermann Pückler Mužakojski (1785–1871) jo musał swójo kněske kubłaŕstwo w Mužakowje pśedaś, jo 1845 pśišeł na derbnjone grunty w Rogeńcu. Kaž w Mužakowje, jo se teke how do togo dał, park pó engelskem pśikłaźe załožyś. Južo wušej 60 lět stary, jo wón wšak wěźeł, až njebuźo móc te płody swójogo źěła wiźeś. „Pěskowa pusćina“ pó klišeju jo Pückler w Rogeńcu pśed sobu měł. Jo dał płodnu zemju pśispóraś a jo wukupił tych serbskich burow, źož jo kśěł jich grunty měś. Wón jo jich tek derje zarownał za škódy, na pśikład pśez transport bomiskow, ako jo wjerch kśěł do parka sajźiś. Spomnjeśa gódne jo na kuždy pad: Pśedewšym z rědow Serbow su pśišli te źěłowe mócy, kótarež su Pücklerowej parka w Mužakowje a w Rogeńcu twórili. Póměr Pücklera k Serbam jo pak w slěźenju mjenjej wobswětlona tema. Rowno tej temje jo se intensiwnje pśiwobrośił Werner Měškank. 1985 jo wón pśewzeł źěłowe městno w rogeńskem groźe, w tamnem Wobwodnem muzeju Chóśebuz. Jo wjadł kupki woglědarjow pó groźe a parku.