Slěpe/Schleife. Wót lěta 1924 jo 138 jsow wordowało ceło abo pó źělach wótterganych. Južo 90 lět cuju pótrjefjone wobydlarje tu ból we se, ak jo zwězana ze zgubjenim domownje. Awtor wustajeńce, etnolog Robert Lorenz, jo se pśiwobrośił tomu tšojenju. To jo slěźarski projekt energijoweje fabriki w Knappenrode w kooperaciji z Vattenfallom. Wósebnosć teje drogujuceje wustajeńce lažy we tom, až na eksemplu tśich pśesedlonych jsow se pokažo, kak su wobchadali z pótrjefjonymi wobydlarjami we tśich wšakich politiskich systemach. Wóno źo wó jsy Bukojna/Buchwalde pla Kulowa (wótbagrowana 1928), Čelno/Tzschelln (1976) a Trjebin-Za Góru (2014).