Z Ketlic/Kittlitz. Tradicionelnje na Swěźenju reformacije jo njeźelu była głowna a wólbna zgromaźina Serbskego ewangelskego towaristwa. Na nju jo pśichwatało 29 cłonkow a gósći. Lětosa jo wóna była we jsy Ketlicy, ta lažy mjazy Budyšynom a Lubijom (Löbau). Ketlicy maju fasciněrujuce serbske stawizny a se wobnowjajuce serbske žywjenje: Tam jo statkował ceptaŕ a komponist Korla Awgust Kocor (1822–1904), pśijaśel a wuměłski kolega Handrija Zejlerja (1804– 1872) a w susednej jsy Nosaćicy/Nostitz mjazy drugim teke Michał Domaška (1820–1897) faraŕ, basnikaŕ, sobuzałožaŕ gymnazialnego towaristwa a Maćicy Serbskeje. Row Kocora kaž teke row Domaškojc familije stej se rekonstruěrowałej a w pśiducem lěśe buźo se w tamnjejšej cerkwi oratorium „Pódlěśe“ Zejlerja / Kocora pśedstajiś, wšykno tež z pomocu Friedharda Krawca, agilnego luźa ze serbskeju wutšobu.