Miłoraz/Mühlrose. Swója iniciatiwa pśemóžo wjele gibnuś. Wóna móžo gjardosć, identitu a zgromadnosć we jsy zbuźiś a mócowaś. Prědkstojaŕ Waldemar Locke jo togo wěsty. Wón jo wót lěta 1994 cłonk gmejnskeje rady. Wót lěta 1999 źěła teke we wejsnej raźe. „Na kjarchobje smy gano jaden wopomnjeński kamjeń zasej stajili a Lipowu drogu wurumowali“, wulicujo nam wót pśewjeźonych fryjwólnych akcijow. Wót apryla jo ten 53lětny muž wuzwólony prědkstojaŕ Miłoraza, jsy, źož bydli tuchylu 210 wobydlari. Peter Krause, Enrico Kliemann a Andreas Schneidewind stoje jomu ako cłonki wejsneje rady pśi boce. Wót lěta 2014 do apryla lětosa njejo tudy žedna wejsna rada źěłała. Nowy zachopjeńk jo stakim šym wažnjejšy.