Z Města/Cottbus. Pśednosk Hartmuta Leipnera na Šuli za dolnoserbsku rěc a kulturu jo był planowany južo na dwěma terminoma do togo, pśewjeźenje pak pśecej njejo se raźiło. Ale: Tśeśi raz, ga pětk tyźeń, jo se ten pśednosk wuspěšnje pśewjadł. Promowěrowany fyzikaŕ Hartmut Leipner jo z naglědniweju prezentaciju powědał wó swójom źěle na Uniwersiśe Halle-Wytpark na tamnem Interdisciplinarnem centrumje za materialowe slěźenje (IZM) a jo se teke wobšyrnje pśiwobrośił tematice regeneratiwnych energijow a šćita našeje klimy. Až wón jo wó takej fachowej temje połtera góźiny w dolnoserbskej rěcy referěrował – to jo wubuźiło wjeliki respekt jogo publikuma. Tak su to zwuraznili pózdźej pśi „wugódnośenju“ jogo pśednoska.