Něźi 200 muzikowych nagrawanjow – wobźěłanja serbskich spiwow a swójskich kompozicijow na serbskorěcne teksty – jo spiwaŕ, muzikaŕ, komponist a producent Matthias „Kies“ Kießling dotychměst za dolnoserbski rozgłos sćelaka RBB a górnoserbski rozgłos MDR producěrował. To jo wjeliki późěl tych titelow, ako słyšymy w serbskem rozgłosu. Wjelgin tužna powěsć jo, až ten 65lětny jo slědnu njeźelu zamrěł.
Pśed lětami jo se ten muzikaŕ w Žylowje ze swójeju žeńskeju-ceptaŕku dom kupił. Wót 1981 wóženjony, jo wón nan dweju góleśowu a starki dweju źiśigóleśowu. Swójo studijo w Žylowje jo sebje sam natwarił. Tam jo mógał orchestralne a solowe muzikowe titele, cytanja z muzikowym ramikom a cejdejki producěrowaś. Wacej jo ludowe spiwy a instrumentalne twóŕby muzikaliski wobźěłał, ale teke komponěrował. Za muziku jo sam był zagronity, za techniku jo jomu wót lěta 1999 Měsćanaŕ Marko Schoen na boce stojał .