Ze Zagóric/Sagritz. Chtož jo ducy w Dolnych Błotach, ten nadejźo wjele wódy. Rěka damna, něga Serbska Sprjewja, how běžy, gaty a groblicki su ako wšuźi we Błotach. Toś njejo žeden źiw, až how su teke młyny. Jaden młyn, źož nadalej wólej biju, jo Kanowy młyn pla Gólišyna (Golßen), w Zagóricach (Sagritz). Tomu gronje how teke „młyn Łužak“, což jo nimski „Wuschack-Mühle“, což drje pśiźo wót serbskego słowa „ług“. Rědne grunty to su, a młogi raz wjedu šulske rědownje pó młynje.