Z Dešna/Dissen. Ku góźbje nazymskich prozninow póbitujo Domowniski muzej w Dešnje wšake wósebne zarědowanja za źiśi. Glědajucy na to, až Dešno jo bóśonowa wjas, mógu źiśi w muzeju bóśony basliś a pśi tom zajmne fakty wó tych ptaškach nazgóniś. Pśiduce take basleńske póbitowanje buźo wałtoru, 19. oktobra, wót zeger 11:00 do 14:00.

Chtož co wuknuś, kak se butra źěła, ten jo kuždy stwórtk we oktobrje mjazy zeger 11:00 a 14:00 w Dešańskem muzeju na pšawej adresy. How maju štandlicu a wšykno, což hyšći k tomu słuša. Tak mógu gósći sami wuproběrowaś to butrowanje a mógu wuslědk na fryšnem klěbje woptaś.

Dalšna chłošćonka su pjacone jabłuka. Kak wóni se połnje a kak wóni słoźe, to mógu zajmce zgóniś srjodu, 20. oktobra, a teke pśiducu srjodu, 27. oktobra, pśecej wót zeger 11:00 do 14:00.

Pětk, 15. oktobra, a teke pśiducy pětk, 22. oktobra, pšose w muzeju na bajkowu góźinku, pśecej zeger 15:00. Bernd Pittkunings buźo wulicowaś powěsći a bajki z Błotow a buźo teke ze spiwańkami rozwjaseliś.