Rowne/Rohne. W góli blisko Wochožańskeje jamy jo wót zachopjeńka měrca se pśewjadła akcija „wobsajźenja bomow“. Luźe wót kupki „Lautonomia“ su kśěli na ten part protestěrowaś pśeśiwo wótbagrowanju teje góle a pśeśiwo wochožańskej jamje. (Nowy Casnik jo pisał). Srjodu pó swětkach jo policaja te młode luźe wugnała. Teren, źož wóni su póbyli, słuša firmje Vattenfall.
Sakska policaja jo wobwěsćiła, až jo srjodu wótpołdnja protest pśetergnuła. Cil policaje jo był, pšawa firmy Vattenfall zawěsćiś. Wušej togo su kśěli te wobźělone paršony identificěrowaś. Policaja co pókuśeńske procese dalej wjasć. Nadawk za to su dali statnemu rěcnikojstwu w Zgórjelcu.
Vattenfall ako wobsejźaŕ togo kusa góle jo w zachadnych tyźenjach pominał, aby luźe tu gólu spušćili. To pak njejsu te žeńske a muske cynili. Togodla pśepytujo kriminalna policaja, lěc su domacny měr skazyli (Hausfriedensbruch).