Pódstupim/Potsdam. Až do 31. maja mógu gmejny a města pšosby wótedaś, aby byli pśiwzete do serbskego sedleńskego ruma. K tomu jo było w slědnem casu wjele wobradowanjow.

We Wjelcej jo 11. maja měsćańska zgromaźina wótgłosowała, až kśě słušaś k serbskemu sedleńskemu rumoju. Doněnta jo jano ten wejsny źěl Prožym k tomu słušał. Wětšyna głosow za to jo pak relatiwnje mała była. 7 su za to zgłosyli, 4 pśeśiwo tomu a 3 su se głosa zdźaržali.

Hynac su rozsuźili 13. maja w Baršću. Tam jo wejsny źěl Rogow w serbskem sedleńskem rumje. To dej teke tak wóstaś, jo měsćańska zgromaźina wótgłosowała. Ale cełe město Baršć njedej byś w serbskem sedleńskem rumje. To su wobzamknuli z 16:12 głosami.

Teke Feliksowy jazor jo se 11. maja z 3:5 głosami pśeśiwo sedleńskemu rumoju rozsuźił. Dwa zastupnika stej se głosa zdźaržałej.

24. maja su na wobradowanju Rady za nastupnosći Serbow wó tom wobradowali. Serbska rada buźo za kopicu gmejnow, kótaryž su pśeśiwo tomu zgłosyli, sama póžedanje stajiś. Su nazběrali w slědnem casu kopicu informacijow k tomu, kake serbske wěcy w tych gmejnach a městach su.