Z Mósta/Heinersbrück. „Kulkowy swěźeń“ jo nazymska tradicija we tej jsy. Łoni jo wupadnuł, lětosa su jen zasej swěśili. Wjerašk jo był, až luźe z Mósta, Radowize a Groźišća (tej slědnej słušatej Móstoju) su mógli se wótholowaś swóje dwórowe tofle. Pjenjeze za nje pśidu wót kraja, pśez bramborske Ministaŕstwo za wědomnosć, slěźenje a kulturu (MWFK). Zaplanowane jo za to było 5.100 euro wót boka ministaŕstwa. Tam ga jo wěsty gjarnc za zarownanje dodatnych kostow, kenž nastanu pśez nałožowanje Serbskeje kazni. Kradu procowała wó to zarownanje jo se Julia Kahlowa, wjednica Amta za kulturu a turizm w Picańskem amśe. Tych toflow jo było 60. Chtož hyšći co taku toflu měś, daś se sam stara, to płaśi někak 100 euro a jo skazaś w interneśe.