Z Janšojc/Jänschwalde. Tudy maju ze Serbsko-nimskim domowniskim muzejom „dobru śpu“ cełeje jsy. Pśed 25 lětami jo wón nastał w něgajšnej šuli, kótaraž jo w mjazycasu teke była źiśownja. Dobra śpa, to jo mjaztym teke faŕski dwór jsy, kenž jo na drugem boce drogi. Faŕska brožnja a groźe su ga mjaztym teke źěl muzeja, we nich su staśiwy, suknja a wšake druge historiske rědy wustajone. Na faŕskem dwórje su pśedslědny kóńc tyźenja wšake budki, jawišćo a ławki natwarili. W brožni su luźe mógali se woglědaś 360° film wó wobźěłanju lana. Tam jo była modowa pśeglědka, a klown Retzi jo rozwjaselił źiśi. Wón jo pak jano mógł z poł mócy luštowaś, dokulaž jo se kśebjat zranił. Skokaś stakim njejo wěcej mógł. Źiśi na swój part su měli tu góźbu na skokanišću.