Z Města/Cottbus. Wót 12. junija togo lěta ma Domowina nowe wjednistwo. Ten źeń ga běchu delegatki a delegaty z Dolneje a Górneje Łužyce na głownej zgromaźinje w Slěpem wuzwólili nowe zwězkowe pśedsedaŕstwo z dogromady 30 cłonkami, naprědku z pśedsedarjom Dawidom Statnikom a z dwěma zastupnyma pśedsedarjoma Hartmutom Leipnerom a Markom Hančikom. Do togo wažnego gremiuma słušaju ze župy Dolna Łužyca mimo Leipnera Kito Ela, Wylem Janhoefer, Maksimilian Hasacki, Jennifer Dünnbierowa, Franciska Albertowa a Gerald Šejn.

Pó tom, až jo se nowo wuzwólone zwězkowe pśedsedaŕstwo w lěśu konstituěrowało, jo se wóno slědny pětk zmakało w internaśe Dolnoserbskego gymnaziuma w Chóśebuzu k swójomu prědnemu wobradowanju. Dogromady 22 cłonkow jo se wobźěliło - wót nich dwanasćo direktnje a źaseś jo było pśez internet pśišaltowanych. Cełe pósejźenje jo było wiźeś w live-streamje.