Z Města/Cottbus. Źěłanišćo za serbske kubłańske wuwijanje Chóśebuz (ABC) jo dnja 26. awgusta wobradowało z prezencu w žurli šulskego amta. Wobźělili su se wše sobuźěłaśeŕki a sobuźěłaśeŕ ABCeja, tencas jo jich dwanasćo na styri a poł źěłowych městnach, a wjednik šulskego amta Uwe Mader. Wjednica ABC, dr. Christiana Piniekowa, jo se sobuźěłaśeŕkam a sobuźěłaśerjoju za njewomucne źěło njeglědajucy na korona-wuměnjenja a wobstojecu wakancu w slědnem šulskem leśe źěkowała. Tak jo se na nowej šćitanej online-platformje za wucbne materiale, fachowu literaturu a rěcne pomocy pó poł lěśe wušej 75 procentow ceptaŕkow a ceptarjow serbšćiny pśizjawiło.