Z Drjenowa/Drehnow. Z kapału Błośańskich dujarjow jo se drjenojska młoźina zachadnu sobotu pśipórała na kokot. Sedymjo rejtarje a dwanasćo młodych žeńskich jo se wótpołdnja zmakało pśi twarjenju wognjoweje wobory a pótom śěgnuło až k najsy. Ako jo nałog, su teke byli „carne muske“ pśipódla, kótarež su ze frakami a cylinderami pśigótowali njabogego kokota a byli rejtarjam k pomocy. Najsy pśi wejsnej droze su južo pśigótowali blida, ławki a stojnice z piśami a pśikuskami za gósći. Jich jo w běgu dnja było jadnab 200 luźi, ako jo se woglědowało program na jawišću.

Na zachopjeńku jo Franciska Šwjelic (Schwella) pśiwitała gósći na serbski a Jenny Šudric (Schuder) na nimski. Ako su pótom zachopili rejtowaś, stej moderatorce pśedstajiłej młodych rejtarjow a źowća, kótarež su byli w serbskich rejowańskich drastwach. Hyšći do zachopjeńka su mytowali Francisku Šwjelic, dokulaž jo lětosa k źasetemu razoju kokot sobu swěśiła. Tak ako kralowki pózdźej jo wóna dostała pśepas a strus.