Z Hochoze/Drachhausen. Jadnab 300 luźi jo sobotu gromadu pśišło, ako su swěśili wjeliki kokot we Hochozy. Dla togo až jo ten swěźeń łoni wupadnuł (kuždy pěte lěto rejtuju gromadu, łoni jo pak jano młoźina rejtowała), su gólce akle lětosa z muskimi kokota łapali.

Pó zmakanju pśi wejsnej cerkwi jo swěźeński pśeśěg śěgnuł na rejtowanišću. Tam ducy su Picańske měsćańske gerce grali, kótarež su pśewóźowali ten swěźeń. Na naměstnje jo wejsańska młoźina pśigótowała wšake stojnice z piśami a pśikuskami. Wětšy swěźeński stan z piwowymi blidami jo tam był, tak ako mobilne jawišćo, wóz z toaletami, ławki a stojece blida.