W nazymje togo lěta kśě se we wokrejsnem sejmje Sprjewja-Nysa z tym zaběraś, kak buźo a dej se cełe šulstwo we wokrejsu w pśiducych lětach wuwiś. Wósebnje źo pśi tom wó to, źo w městach a we jsach budu te wšakorake šule – te zakładne, te wuše a te cełkowne – a te gymnazije. Wjele na tom njebuźo se wěsće změniś, ale wó wšakem se južo něnto diskutěrujo.

Na pśikład we wjelikej gmejnje Gołkojce. W njej bydli wokoło 10.000 serbskich a nimskich luźi, w Bobowje, w Brodkojcach/Brodkowitz, w Dalicu, w Dubjem, w Glinsku, w Gołbinje, w Hajnku/Hähnchen, w Kokrowje, w Gogolowku, w Gołkojcach, w Kśišowje, w Kósobuzu, w Limbarku, w Górnej, w Popojcach, w Cazowje a we Naseńcach/Wiesendorf. Wětšy źěl tamnych źiśi chójźi do dweju zakładneju šulowu w Gołkojcach a w Kśišowje, źož jo teke južo wjele lět za źowća a gólcow wót 1. do 6. klase serbska wucba.