Prožym/Wjelcej/Carna Plumpa. Mań młodych luźi jo w tyźenju do swětkow dojěła do Prožyma (Proschim) blisko Wjelceje. Tam jo se wótměł 6. Łužyski camp klimy a energije. Tyźeń jo był połny z workshopami (mjazy drugim wó Serbach), ekskursijami, filmami a źiwadłom. Weto jo lětosa wšo hynac było. Źož jo se howacej „jano“ pór hundert luźi zgromaźiło, jo jich lětosa mjazy 3.500 do 4.000 było.
Co jo lětosa hynac było?
Lětosa su wósebne akcije planowane byli. Na te jo pšosył zwězk „Ende Gelände“. Wón pomina wótstupjenje wót brunicoweje energije, a to ned. Wóni su mjazy drugimi kazali na akcije „ciwilneje njepósłušnosći“. Toś su nejžperwjej jadnu demonstraciju planowali za kuždego. Wóni su wušej togo pśipowěźeli, až kśě hyś do jamy, aby tam blokěrowali technisku infrastrukturu. Z tym su kśěli pśetergnuś wudobywanje brunice wót 13. do 16. maja.
Co jo było we Wjelcańskej jamje?