Z Dešna/Dissen. Pětk połdnjo jo bramborske Ministaŕstwo za wědomnosć, slěźenje a kulturu (MWFK) pšosyło na medijowe rozgrono w Dešnje. Na dwórje Domowniskego muzeja jo Babette Zenkerowa pśiwitała gósći, kótarež su se rozgranjali wó pśichodnem spěchowanju serbskich projektow. Mjazy pśibytnymi su byli Měto Nowak wót MWFK, zastupny jadnaŕ Domowiny Markus Końcaŕ, Lutz Laschewski wót Łužyskego instituta a kamerateam sćelaka „Lausitz TV“.

Statne pjenjeze za planowane spěchowanje słušaju k Zwězkowym srědkam (Bundesmittel) za strukturnu změnu we wuglowych regionach. W Bramborskej dej šesć serbskich projektow dostaś 19 milionow euro wót lěta 2022. Tobias Dünow, statny sekretaŕ MWFK a w kněžaŕstwje zagronity za nastupnosći Serbow, jo chwalił źěło serbskich institucijow a skoboźił: „Aby wuchowali serbsku kulturu a rěc, musymy wěcej cyniś. Ja se togodla wjaselim, až móžomy spěchowaś dobre projekty z tymi nowymi srědkami.“