Z Města/Cottbus. Bźez wernisaže jo musała wustajeńca „WOBRAZE KRAJINY. Pśechod 03“ w Dolnej Łužycy se zachopiś, korony dla. Ale se zakóńcyś bźez finisaže – k tomu njejo pśišło. Dostojna finisaža jo se pśewjadła sobotu wjacor w Galeriji Bramborska z koncertom. Zawjeźeńske słowa jo powědał Jan Budar, direktor Załožby za serbski lud, kótaraž jo jadna tych wjele partnarjow a pódpěrarjow togo mjazynarodnego wuměłskego projekta. Jan Budar jo se wuźěkował wšym wobźělonym, wósebnje tym wuměłcowkam a wuměłcam a tym wuznamnym patronam togo projekta, ako su: ministaŕka za wědomnosć, slěźenje a kulturu Bramborskeje Martina Münchowa, saksojska statna ministaŕka za wědomnosć a wuměłstwo Eva-Maria Stangowa, ministaŕ za kulturu Słowjeńskeje Zoran Poznič, krajny hejtman Korutańskeje Peter Kaiser.