Z Wórjejc/Hoyerswerda. Slědny tyźeń wałtoru jo wórjejski wušy šołta Torsten Ruban-Zeh (SPD) pśi pósejźenju měsćańskeje rady k wěsći dał, až Wórjejce nadalej dostanu srědki ze Serbskego komunalnego programa. Toś te srědki za Wórjejce jo Saksojske Ministaŕstwo nutśikownego wótnowotki pśizwóliło. Ta komuna pótakem dostanjo za 2021 pawšalu wót 5.000 euro. „To pśipokazanje (Zuweisung) jo zwězane na wěcejwudanki (Mehraufwendungen) w zwisku z pógónjenim dwójorěcnosći“, jo rozkładł wušy šołta. „Stakim móžo se ta pawšala wužywaś na pśikład za serbsko-nimske wutoflowanje a pópisanja, za pśełožki, za głowy listow a za dokumentowe pśedłožki, za znatecynjenja, informaciske brošurki, za systemy drogownikow, za zjawnostne źěło, internetowe wustupy a wěcej.“

We Wórjejcach, tak jo Torsten Ruban-Zeh pódšmarnuł, jo serbska rěc we zastojnstwje a w zjawnosći wěcej prezentna ako pjerwjej. To by dejało byś za to město pógóń za pśichod. Gromadne procowanja k zdźaržanju a dalejwuwiśu serbskeje rěcy a kultury we měsće Wórjejce a jogo měsćańskich źělow deje se dalej wjasć.