Ze Slěpego/Schleife. W slěpjańskej gmejnje rosćo woboranje pśeśiwo planowaneju fotowoltaice na mułkojskich wótsypanišćach (Mulkwitzer Hochkippen). Wěcej ako 80 luźi, zwětšego ze Slěpego, Rownego a Mułkojc su gano demonstrěrowali pśed pósejźenim gmejnskeje rady pśi Serbskem kulturnem centrumje. Wóni kśě zašćitowaś te wusoke wótsypanišća, naturu a wjelerakosć družynow. Wóni cwibluju, až take solarne załožki budu tej gmejnje, firmam a wobydlarjam k wužytkoju. Na póžedanje gmejnskego raźca Marco Jańša (CDU) su toś styri dypki wzeli na dnjowny pórěd togo pósejźenja. Wóni pótrjefiju wobzamknjenja dla napóranja twaŕskich planow „Solarpark Hochkippe Nochten“ a fotowoltaiku „Mulkwitz-West“, „Bahnstrecke Schleife“ a „Umspannwerk Schleife“.