Z wobrazowym zwězkom „Tief im Osten - Die Lausitz im Wandel“ jo Jürgen Maćij (*1953) zgromaźił 150 swójich fotografijow. Srjejźnonimke nakładnistwo (mdv Mitteldeutscher Verlag GmbH) z Halle nad Solawu jo wudał te knigły prědnego apryla. Carnoběłe fota pokažu wšedny źeń luźi w Dolnej a Górnej Łužycy wót lěta 1976 až do źinsajšnego. Pśi tom nadpadnjo, až su jadnotliwe fota nastali zwenka abo na kšomje Łužyce, ako na pśikład w Drježdźanach abo w měsće Eisenhüttenstadt. Na zachopjeńku jo Bernd Lindner pisał pśedsłowo, w kótaremž wopišo žywjenje a fotografiske statkowanje Jürgena Maćija. Kulturny historikaŕ Lindner wiźi jogo ako „nejwažnjejšy chronist wobrazow swójeje domownje w nowšem casu“.