Z Města/Cottbus. Srjejź apryla jo wujšeł „Aktionsplan 2021/Plan póstupowanja 2021“ w ramiku pśedewześa „Walorizacija imaterielnego kulturnego derbstwa w nimsko-słowjańskem konteksće“. Sto eksemplarow kompaktnego zešywka (format A5, 34 bokow) su śišćali w Budyšynje, wudane wót Serbskego Instituta (SI). Kooperěrował jo SI za to z Łužyskim institutom za strategiske póraźowanje (LI) z Chóśebuza. Plan dej – mjazy drugim – zagronitam w politice a domowniskim muzejam w Dolnej Łužycy k pomocy byś. Wósebnje myslony za kooperacisku seś Łužyskeje muzejoweje krajiny (Lausitzer Museenland), pokažo wón na móžnosći, aby institucije pólěpšyli swójo kulturne źěło w casu strukturneje změny.