Z Města/Cottbus. Až jo 25lětna spiwaŕka Lena Hauptmannojc woblico aktualnego wudaśa casopisa „Musiker Magazin“, njejo pśipad. Młoda Chóśebuzaŕka jo akle w decembrje dobyła „Nimske myto za rock a pop“ (Deutscher Rock & Pop Preis). Ze serbskim jazz-pop-spiwom „Tysac Cowanjow“, kenž jo wóna sama komponěrowała, jo w głownej kategoriji „Singer Songwriter“ wordowała dobyśaŕka. To jo było prědny raz, až jo dobył serbski pśinosk pśi góźbje togo wuběźowanja, kótarež se zarědujo wót lěta 1983.