Šesćźaset lět – to jo radna licba, teke za žywjenje cłowjeka. Móžomy wjele dožywiś a zwónoźeś w toś tej dobje, zwjaselece a wobtužece tšojenja. To płaśi se wě teke za jubilara Franka Kosyka, kenž jo dnja 27. měrca 2021 swój kulowaty 60. narodny źeń swěśił.

Ako syn ceptarja jo prědne lěta wótrosł na Majberku, to jo wótlažana wjaska na pódpołnoc Chóśebuza. Abituru jo zwónoźeł w Chóśebuzu. Pó abiturje jo mógał na ceptaŕstwo za pśedmjata rušćinu a engelšćinu studěrowaś a jo w lětoma 1983 a 1984 póbył na uniwersiśe w Rostowje na Donje. Pó studiumje njejo se wrośił do domownje, ale jo tam źěłał, źož su jogo pósłali. To jo było w Kamjeńcu, źož jo wót 1984 až do 1994 žywy był. W tom casu jo cłonk tamnejšeje domowinskeje kupki był, pśeto Frank Kosyk ma serbske kórjenje. Jaden stary nan póchada z Wjerbna, jadna stara maś z Bórkow. Mimo togo wuznajo se kradu derje z pólinowymi mjenjami wokoło Kopaca.