Jadno tematiske śěžyšćo, kenž cytarjeju aprylskego wudaśa Rozhlada do wócowu bijo, su onomastiske – to groni mjenjowědne – rozpominanja. Wósebnje zajmne za Dolnoserba dejał byś na kuždy pad – rownož tekst jo górnoserbski napisany – onomastiska studija wó familijowych mjenjach Trjebina z pjera Ruth Mroskec. Awtorka chyli zajm na to, až pśed 75 lětami jo był Trjebin hyšći pšawa serbska wjas, źož familije su mimo mało wuwześow serbowali. Tak su teke familijowe mjenja we tej jsy do kóńca lěta 1945 serbske byli, což jo se pótom změniło. Nimske mjenja su se serbskim pśitowarišyli. Wjelgin na škódu jo było zgubjenje źělow Trjebina za wudobywanje brunice. „Toś jo nejwušy cas, až se familijowe mjenja zachowaju“, póznajo awtorka. We swójej studiji pódajo pśikłady za serbske familijowe mjenja z Trjebina a krotko rozkładujo jich nastaśe a wóznam.