Sportowe zjadnośeństwo „Eintracht“ we Drjenowje pla Picnja móžo lětosa slědk glědaś na wažny a rědny jubilej. Rowno pśed 100 lětami bu wóno załožone. Pśi góźbje togo kśě w juniju wugótowaś sportowy swěźeń z młogimi zarědowanjami. Drjenojske sportaŕki a sportarje by se wjelgin wjaselili, gaby mustwo „Serbske koparje“ tam grało, a to ako wósebny wjerašk togo jubileja. Do mustwa „Serbske koparje“ ga słušaju teke žedne balokoparje z Drjenowa a ze susednych jsow Hochoza, Turnow a Janšojce.

Ako su se kóńc měrca w Dešnje zmakali cłonki pśedsedaŕstwa „Serbskich koparjow“, su powědali wó tom pśepšosenju z Drjenowa, a su to raźi pśiwzeli. Naraźili pak su, až serbske mustwo by mógało graś akle w juliju, dokulaž tuchylu a nejskerjej tek w pśiducych tyźenjach wjelgin śěžko buźo, pśewjasć zgromadny trening a se z tym pśigótowaś na to graśe w Drjenowje. Wušej togo nejskerjej buźo tak, až dla korony te wejsne mustwa docełego w něntejšnej sezonje wěcej graś njebudu.