Z Kiruny/Kiruna. Samiske su žywe w styrich krajach: „Sápmi“ se wupśestrějo pó Norwegskej, Šwedojskej, Finskej a Rusojskej. Wšuźi su wóni mjeńšyna. We tych skandinawiskich krajach maju swóje parlamenty (Sámediggi/Saemiedigkie/Sämitigge/Sää’mte’gg) a w Rusojskej Kuelnegk Soamet Sobba (to slědne njejo pśipóznate wót kněžaŕstwa). Wjelerakosć jich rěcow jo wjelika. Sámi su indigeny lud, kenž jo pó tradiciji žywy wót kubłanja sobow. Soby njespórajoś do groźi, wóni su jano połdomesticěrowane a śěgaju pó naturje na wósebnych „rutach“ mjazy gólami a górami. Luźe su je pjerwjej pśewóźowali, mjaztym glědaju kubłarje sobow ze „snowmobilami“ pó rědownjach. To kubłanje sobow bywa wěcej problematiske. Rozmjej: Něga góle a natura stej byłej za kuždego, něnto wšo ma wobsejźarja. To dopomina na stary konflikt. Zapšawym ga pśisłušaju te strony wšym. Za Samiske to groni, až kuždy móžo tam soby kubłaś, abo se žywiś na někaki part, dalokož njeznicyjo wšykno. Za štat to groni: Což „wšym“ pśisłuša, pśisłuša štatoju. Togodla mógu, pśegnanje formulěrowane, štatne firmy a zastojnstwa cyniś, což kśě.