Serbski internet/Aus der sorbischen Internet-Community. Dnja 14. januara jo se sejźeli pěś familijow z nagromadu sedym źiśimi wót šesć do dwanasćo lět pśed swójimi kompjuterami, aby dožywili prědnu serbsku digitalnu wucbu. Wucbu su cłonki serbskego familijowego towaristwa „Gromaźe“ iniciěrowali a su namakali pódpěru Rěcnego centruma Witaj (RCW). Rěcny pedagog Aleksander Draguła wóneje institucije se stara wó planowanje a pśewjeźenje digitalneje wucby. Za prědnu góźinu jo pśigótował bajku, ako jo pśednjasł a k tomu wobraze pokazał. Pó wulicowańku jo se rozgranjał z wobźělnikami wó bajce a jo se za detailami tšojenja pšašał. Źiśi su se procowali, aby serbski wótegronili. Zaměr digitalneje wucby jo, až wudopołnijo se z njeju něntejšna distancna serbska wucba. Na drugem boce deje serbskorěcne źiśi dožywiś dalšne wósoby, kenž serbski powědaju. Familije na swój part wobchowaju mjazy sobu kontakt w casu pandemije.