Z Města/Chóśebuz. Łužyska kultura jo bogatša ako se to młogi raz w medijach wótbłyšćujo. Kopicu festiwalow mamy, teke ze subkulturelnym, alternatiwnym charakterom. Daś to jo „Wilde Möhre“ w Chóricach (Göritz) blisko Drjowka „Stuss am Fluss“ w Chóśebuzu, „Landflucht“ w Bukowku (Klein Buckow) pla Grodka, „Lusatia“ (w Chóricach) a „KommenundGehen“ (2020 Das Sechsstädtebundfestival!, źož zwězaju klasisku muziku a pop), młoźinski festiwal „Meta Solis“ we Krabatowej skałje w Miłočicach (Njebelčicy/Nebelschütz) z elektroniskeju muziku abo heavy-metal-festival „Nuckstock open air“ w Nuknicy (Nucknitz, gmejna Chrósćicy/Crostwitz). Wšake su zmakanišćo serbskeje młoźiny, pla drugich jo publikum kradu měšany.

Na lětosnem festiwalu „Wilde Möhre“ jo nastała ideja, powšyknje serbsku kulturu do takich festiwalow zapśěgnuś, nejlěpjej bźez jatšownych jajow abo ludowych drastwow. Daniel Häfner wót BTU (wón źěła pśi profesurje za Socialne wobswětowe pšašanja) jo toś w ramiku projekta „Walorizacija serbskego kulturnego derbstwa“ pšosył na wideo-rozgrono ku tej temje dnja 9. januara.