Z Chóśebuza/Cottbus. Pśedsedaŕstwo Domowinskeje župy Dolna Łužyca jo se na swójom posejźenju slědny tyźeń wałtoru w Serbskem domje zaběrało z dwěma terminoma. Njebuźo móžno, lětosnu głownu zgromaźinu župy pśewjasć w prědnem kwartalu lěta. Toś kśě tu zgromaźinu pśewjasć w maju. Za to su cłonki pśedsedaŕstwa se wupytali pětk, 28. maja 2021 w Rogowje/Horno. Mjazy drugim mógu se tam cłonki pśedstajiś a „wótžognowaś“, ako kandiděruju za nowe Zwězkowe pśedsedaŕstwo Domowiny. Župa Dolna Łužyca ga móžo do togo wažnego Domowinskego gremiuma pósłaś šesć cłonkow a mimo togo dej amt zastupnego Domowinskego pśedsedarja teke w pśichoźe wobsajźiś cłonk z Dolneje Łužyce. Drugi wažny termin jo ten ze głownu zgromaźinu „wjelikeje“ Domowiny. Za njen su měli w Domowinskej centrali w Budyšynje tśi terminy w lěśu. Planowany termin ga jo był kóńc měrca, a to w Slěpem. Korony dla pak njebuźo to móžno. W pśedsedaŕstwje župy Dolna Łužyca su naraźili, až se wóna pśewjeźo 12. junija.