Z Chóśebuza/Cottbus. Górnikojska firma LEAG jo slědnu srjodu k wěsći dała swój aktualizěrowany „Rewěrowany plan“ a pśiměrił swóje plany kaznjam wótstupjenja wót wudobywanja brunice. Zwězkowy sejm jo na tom dnju pśigłosył dogronoju wó wugótowanje wótstupjenja wót wudobywanja brunice w Nimskej. Stakim pśedlaže něnt wšykne kazniske zakłady, aby dalšne jsy njewordowali wótbagrowane za brunicu. Dokulaž milinaŕnje budu stakim krotšy cas źěłaś, pótrjebaju wóni mjenjej wugla, ako LEAG jo w lěśe 2017 pśedwiźeła.

W Bramborskej pótrjefijo to zwětšego Wjelcańsku jamu, how buźo LEAG 200 milionow tonow brunice mjenjej wudobyś. Z tym buźo Prožym wóstaś. Slězyna jo tek koaliciske dogrono partajow w bramborskem kněžaŕstwje.

W Sakskej musy LEAG dla politiskich směrnicow reducěrowaś rozměru źěłow w Rychwałdskej jamje (zgórjelski wokrejs). Za źělne pólo Miłoraz we Wochožanskej jamje pak wiźi LEAG nadalej politisku a góspodaŕsku pótrjebu. Stakim wordujo Rychwałdska jama mjeńša, wochožanska jama pak wětša.