Ze slěpjańskich stronow/ Schleifer Gegend. Kóńc lěta 2015 jo tegdejšy slěpjański šołta Reinhard Bork w rozgronje z našym awtorom swóje starosći a wobmyslenja k prědnotńym stronam (Vorranggebiet) „Wochozy/Nochten II“ wugronił. Tencas jo była teke gmejna Slěpe pótrjefjona wót dankowych slědkpłaśenjow na Vattenfall. Su wobstojali prědne njewěstosći, lěc docełego źo tak dalej z teju wugloweju jamu, ako wjele lět jo se powědało. Pśeto Vattenfall jo pytał za brunicowe góspodaŕstwo kupca. Z tym jo za Slěpe wjele wisało na slědnej nitce. Wjele lět su śerpjeli gmejnske źěle Rowne/Rohne, Mułkojce/Mulkwitz, Slěpe/Schleife na pódpołdnjo zeleznice a Trjebink/Klein Trebendorf. Nichten njejo wěcej inwestěrował. Spušćone dwóry, rozpadane pódlańske twarjenja, starosći dla Njepilic dwóra. Samo gmejna jo wopśestała, něźi we wónem źělu Slěpego, kenž jo na pódpołdnjo zleznice, inwestěrowaś. Reinhard Bork jo drje měł pśed pěś lětami pšawe widanje, ako jo we kóńclětnem rozgronje gronił: „Myslim se, až tam by mógało hyšći něco na nas pśiś.“ A tak jo pśišło.