Vattenfall co pśedaś swóje brunicowe jamy a milinarnje we Łužycy, južo dlej se pišo wó zajmcach za nje. Něnto se zda, ako by se wobtwarźili wšake do togo njewěste powěsći. Zwětšego we šwedojskich medijach su zachadny pětk a sobotu wó tom pisali, až česka EPH (Energetický a Průmyslový Holding) co pśewześ łužyske jamy a milinarnje. Tam se pišo, až EPH snaź njemusy nic za to zapłaśiś. W „Svenska Dagbladet“ jo Peter Alestig sobotu pisał, až za jogo zdaśim šwedojski (socialdemokratiski) ministarski president Stefan Löfven by mógł pódpisaś dogrono, źož se darijo brunicowa šparta někomu dermo, jano, aby wótbył „tu wjeliku žałosć“. Rozsuźecy argument za to jo fakt, až z brunicu njamógu pjenjeze zasłužyś. (Šwedojske kněžarstwo jo wobsejźaŕ Vattenfalla). Brunicowa šparta Vattenfalla ga jo kradu deficitarne pólo. Toś se pšaša, cogodla co něcht ju scełego měś? Analysty tych medijow dodaju, až EPH jo unikum w europejskej energijowej branžy. Firma wěri na renesancu brunicoweje a płunoweje energije a inwestěrujo do starych brunicowych a płunowych milinarnjow a se naźeja na dłujkodobny efekt.