W dwěma zachadnyma wudaśoma Nowego Casnika – w lětosnem 43. a 47. wudaśu – sćo namakali na sedymem boce pokaz na sociolinguistisku studiju a pšosbu, pśisłušny online-napšašnik wudopołniś. Tenraz comy wobšyrnjej zajm na to slěźeńske pśedewześe chyliś – comy jo tak ako na njom wobźělonu rěcywědnicu dr. Joannu Chojnicku dokradnjej pśedstajiś.

Srjejź 2019 jo se startował na Uniwersiśe Adama Mickiewicza (UAM) w Póznanju (Pólska), na tamnem wobłuku za keltiske studije, slěźeński projekt, kenž jo se pśedewzeł pśirownowanje situacije dolnoserbskeje a bretońskeje rěcy źiwajucy na to, kak preguju nowe powědaŕki a powědarje daneje mjeńšynoweje rěcy to rěcne wuwiśe. K slěźeńskemu teamoju słušaju Michael Hornsby (UAM), Nicole Dołowy-Rybińska (Pólska akademija wědomnosćow), Jeanne Toutous (Université de Rennes) a – wót nowembra 2019 – Joanna Chojnicka (UAM). Ta slědna jo zagronita za terenowe slěźenje w městoma Chóśebuz w Dolnej Łužycy a Rennes w Bretani (Francojska). Do togo až wěcej wó projekśe se wujasnijo, comy glědaś na biografiju młodeje wědomnostnice Joanny Chojnickeje.