Z Wjerbna/Werben. Gmejna Wjerbno jo we swójej dłujkej historiji wjele wuznamnych wósobinow spłoźiła a jim domownju dała. Jadna z tych wósobinow jo był Mato Kosyk, kótaregož serbske basnikaŕstwo jo sławne až do źinsajšnego. Njeźelu tyźeń jo był jogo 80. źeń zamrěśa.

Ku góźbje 80. dnja zamrěśa Mata Kosyka (18. junij 1853 do 22. nowembra 1940) jo wótpołožyła mała delegacija gmejnskego zastupnistwa stykane kwětki pśi pomniku za togo dolnoserbskego poeta. Dla korona-wobgranicowanjow jo mała delegacija teke zastupowała wjerbańsku Domowinsku kupku, dobrowólnu wognjowu woboru, sportowe towaristwo, tradiciske towaristwo, wejsnu młoźinu, cerkwju tak ako wšykne pśedewześa, zawody a firmy teje jsy. „Jo škóda, až jo musała delegacija lětosa taka wjelgin mału wóstaś“, jo woblutował šołta Joachim Dieke (66) a jo dodał: „Dopomnjeśe na Mata Kosyka my se we cesći wažymy.“